بارود کے ذرے جو فضاؤں میں رہیں گے

بارود کے ذرے جو فضاؤں میں رہیں گے

پھر کیسے پرندے یہ ہواؤں میں رہیں گے

وحشت زدہ ماحول ہمیں کھانے لگا ہے

اب سوچ لیا ہے کسی گاؤں میں رہیں گے

اب گاڑ دئے ہیں یہاں خیمے تو کریں کیا

ہم خوش ہیں کہ ہجرت کی بلاؤں میں رہیں گے

جب دل میں چھپے پیار نے دم توڑ دیا تو

پھر سارے ہی جذبے یہ خلاؤں میں رہیں گے

تربت کوئی کیسے انہیں آغوش میں لے گی

مسلے ہوئے یہ پھول جو پاؤں میں رہیں گے

بدلے ہوئے ماحول پہ میں سوچ رہا ہوں

کیا پیار کے جذبے کبھی ماؤں میں رہیں گے

barud ke zarre jo fazaon mein rahenge

phir kaise parinde ye hawaon mein rahenge

wahshat zada mahaul hamen khane laga hai

ab soch liya hai kisi gaon mein rahenge

ab gar diye hain yahan kheme to karen kya

ham khush hain ke hijrat ki balaon mein rahenge

jab dil mein chhupe pyar ne dam tor diya to

phir sare hi jazbe ye khalaon mein rahenge

turbat koi kaise unhen aghosh mein legi

masle hue ye phul jo paon mein rahenge

badle hue mahaul pe main soch raha hun

kya pyar ke jazbe kabhi maon mein rahenge