Arooz is now on the App Store, for iPhone and iPad. Download →

All poetry

ہم ہیں بنیاد تو ہر شخص منارے جیسا

Vakeel Ahmad Hayat (b. 2001)

ہم ہیں بنیاد تو ہر شخص منارے جیسا

ہم کو ملتا ہی نہیں کوئی ہمارے جیسا

آج بستی میں ہماری ہے عجب ہی رونق

آج نکلا ہے یہاں چاند تمہارے جیسا

کیا بھلا ان سے جدا میری ہے پہچان کوئی

وہ سمندر کی طرح ہیں میں کنارے جیسا

حال کچھ دل کا ہوا گردش دوراں کے سبب

کسی مفلس کے بلکتے ہوئے پیارے جیسا

روز لڑتا ہے وہ اندر کے اندھیروں سے حیاتؔ

آپ کو لگتا ہے جو شخص ستارے جیسا