زہے قسمت کہ قاصد یار کا لے کر پیام آیا

زہے قسمت کہ قاصد یار کا لے کر پیام آیا

مگر افسوس صد افسوس وقت اختتام آیا

کرامت دیکھیے ساقی کی مستانہ نگاہوں کی

کہ جس دم اٹھ گئیں رندوں تلک خود چل کے جام آیا

حسد سے ہاتھ مل کر رہ گئے سارے رقیب اس دم

زباں پر جب کسی کی اتفاقاً میرا نام آیا

ترس آتا ہے اس کی بے بسی پر خود گلستاں کو

جو طائر فصل گل کے آتے آتے زیر دام آیا

کرو گے یاد جب دنیا سے ہم ہو جائیں گے رخصت

کہو گے تب یہی تو تھا جو ہر مشکل میں کام آیا

خطا کی ہو کسی نے انگلیاں میری ہی سمت اٹھیں

کسی کا جرم ہو سر پر مرے ہی اتہام آیا

ادھورا پن ازل سے تھا لکھا شاید مقدر میں

کہ خوشیاں کیا مرے حصے میں غم بھی ناتمام آیا

برا جب وقت آیا سب نے یاسرؔ راہ لی اپنی

نہ کوئی چارہ گر ٹھہرا نہ کوئی یار کام آیا

zahe qismat ke qasid yar ka le kar payam aya

magar afsos sad afsos waqt-e-ikhtitam aya

karamat dekhiye saqi ki mastana nigahon ki

ke jis dam uth gain rindon talak khud chal ke jam aya

hasad se hath mal kar rah gae sare raqib is dam

zaban par jab kisi ki ittifaqan mera nam aya

taras ata hai us ki be basi par khud gulistan ko

jo tair fasl-e-gul ke ate ate zer-e-dam aya

karoge yad jab duniya se ham ho jaenge rukhsat

kahoge tab yahi to tha jo har mushkil mein kam aya

khata ki ho kisi ne ungliyan meri hi samt uthen

kisi ka jurm ho sar par mire hi ittiham aya

adhura pan azal se tha likha shayad muqaddar mein

ke khushiyan kya mire hisse mein gham bhi natamam aya

bura jab waqt aya sab ne yasar rah li apni

na koi chara gar thahra na koi yar kam aya