محبت کی حرارت سے ہوا سارا لہو آتش

محبت کی حرارت سے ہوا سارا لہو آتش

تخیل شبنمی ہے گرچہ میری گفتگو آتش

نگار زندگی میں اس کے دم سے ہی اجالا ہے

چمن ویرانہ ہوتا گر نہ ہوتی آرزو آتش

خوش آتی ہے ہم آشفتہ سروں کو اس کی یہ عادت

کبھی مانند شبنم اور ہوتا ہے کبھی آتش

جھلس جاتی ہیں وہ آنکھیں جنہیں کچھ خواب بننے تھے

بنا دی عہد نو کی نفرتوں نے جستجو آتش

عبارت آج کل کی زندگی ہے ان عناصر سے

سیاست آمریت خون ناحق کو بہ کو آتش

طمانیت کی لازم شرط ہے خوش نیتی ورنہ

تگ و دو بے بضاعت اور ساری ہاؤ ہو آتش

ظفرؔ سے اب تو نظریں بھی ملانا آزمائش ہے

کہ گرمیٔ جہاں سے ہو گیا ہے مو بہ مو آتش

mohabbat ki hararat se hua sara lahu atish

takhayyul shabnami hai garche meri guftugu atish

nigar-e-zindagi mein us ke dam se hi ujala hai

chaman wirana hota gar na hoti arzu atish

khush ati hai ham ashufta saron ko us ki ye adat

kabhi manind-e-shabnam aur hota hai kabhi atish

jhulas jati hain wo ankhen jinhen kuchh khwab banne the

bana di ahd-e-nau ki nafraton ne justuju atish

ibarat aj kal ki zindagi hai un anasir se

siyasat amiriyyat khun-e-nahaq ku ba ku atish

tamaniyat ki lazim shart hai khush naiti warna

tag-o-do be bizaat aur sari hao ho atish

zafar se ab to nazren bhi milana azmaish hai

ke garmi-e-jahan se ho gaya hai mu ba mu atish