کچھ تو محبتوں کی وفائیں نبھاؤں میں

کچھ تو محبتوں کی وفائیں نبھاؤں میں

شاداب بارشوں کی ہوائیں نبھاؤں میں

اتنے قریب آؤ بدن بھی سنائی دے

گزرے دنوں کی نرم صدائیں نبھاؤں میں

دل بھی تو چاہتا ہے کہ سبزہ کہیں کھلے

بنجر زمیں پہ کالی گھٹائیں نبھاؤں میں

دریا کی لہر پیاسے کناروں کو سونپ دوں

معصوم آرزو کی خطائیں نبھاؤں میں

شاداب ہو بھی سکتے ہیں چہرے نصیب کے

پھیلاؤں ہاتھ اور دعائیں نبھاؤں میں

رہ جائے کچھ تو جلتے بدن پر اسے رکھوں

ہر لمحہ خوشبوؤں کی قبائیں نبھاؤں میں

منظور ہو تمہیں تو محبت کے نام پر

معصوم خواہشوں کی سزائیں نبھاؤں میں

تا عمر زندگی کو نبھانا محال ہے

کچھ روز سادگی کی ادائیں نبھاؤں میں

کھولوں نہ روشنی کے دریچے نگاہ میں

اوشاؔ دلوں کی تیرہ فضائیں نبھاؤں میں

kuchh to mohabbaton ki wafaen nibhaun main

shadab barishon ki hawaen nibhaun main

itne qarib ao badan bhi sunai de

guzre dinon ki narm sadaen nibhaun main

dil bhi to chahta hai ke sabza kahin khule

banjar zamin pe kali ghataen nibhaun main

dariya ki lahr pyase kinaron ko saunp dun

maasum arzu ki khataen nibhaun main

shadab ho bhi sakte hain chehre nasib ke

phailaun hath aur duaen nibhaun main

rah jae kuchh to jalte badan par use rakhun

har lamha khushbuon ki qabaen nibhaun main

manzur ho tumhen to mohabbat ke nam par

maasum khwahishon ki sazaen nibhaun main

ta umr zindagi ko nibhana muhal hai

kuchh roz sadgi ki adaen nibhaun main

kholun na raushni ke dariche nigah mein

usha dilon ki tira fazaen nibhaun main