ایک آشنا اکثر پاس سے گزرتا ہے

ایک آشنا اکثر پاس سے گزرتا ہے

مجھ پہ میری سچائی آشکار کرتا ہے

کس قدر ہٹیلا ہے تیرا بے زباں سایہ

جسم کی طرح اکثر روح میں اترتا ہے

آپ کس لئے مجھ کو دیکھتے ہیں حیرت سے

آدمی محبت میں کچھ بھی کر گزرتا ہے

کیا خبر یہ بستی ہی آندھیوں میں اڑ جائے

اک پرندہ پر اپنے کھولنے سے ڈرتا ہے

تیرے نام کے سائے رکھ کے اپنے ہونٹوں پر

صرف میں بکھرتی ہوں تو کہاں بکھرتا ہے

اک قریب کا رشتہ پھیرتا ہے جب نظریں

آدمی نہیں مرتا اعتبار مرتا ہے

بے زباں لکیریں ہیں نامراد خاکے ہیں

دیکھنا ہے اب ان میں کون رنگ بھرتا ہے

خوف قربتوں کا بھی خوف فاصلوں کا بھی

زندگی کا ہر لمحہ ڈوبتا ابھرتا ہے

جب تمہارے بارے میں سوچتی ہوں میں اوشاؔ

آسمان سے دل میں نور سا اترتا ہے

ek ashna aksar pas se guzarta hai

mujh pe meri sachchai ashkar karta hai

kis qadar hatila hai tera be zaban saya

jism ki tarah aksar ruh mein utarta hai

ap kis liye mujh ko dekhte hain hairat se

admi mohabbat mein kuchh bhi kar guzarta hai

kya khabar ye basti hi andhiyon mein ur jae

ik parinda par apne kholne se darta hai

tere nam ke sae rakh ke apne honton par

sirf main bikharti hun to kahan bikharta hai

ik qarib ka rishta pherta hai jab nazren

admi nahin marta etibar marta hai

be zaban lakiren hain namurad khake hain

dekhna hai ab un mein kaun rang bharta hai

khauf qurbaton ka bhi khauf faslon ka bhi

zindagi ka har lamha dubta ubharta hai

jab tumhare bare mein sochti hun main usha

asman se dil mein nur sa utarta hai