اکثر تنہائی سے مل کر روئے ہیں

اکثر تنہائی سے مل کر روئے ہیں

ہم نے اپنے اشک آگ سے دھوئے ہیں

بہت نبھائی لین دین کی رسمیں بھی

کچھ آنسو پائے ہیں کچھ غم کھوئے ہیں

جب بھی بارش نے مٹی سے منہ موڑا

جلتے سورج نے ذرات بھگوئے ہیں

خبر جہاں ملتی ہے اپنے ہونے کی

ہم اس منزل پر بھی کھوئے کھوئے ہیں

جب خود کو پانا ہی مشکل کام ہوا

کیوں کچے دھاگے میں پھول پروئے ہیں

بال و پر پاتے ہی اڑے ہواؤں میں

ہم نے جو نزدیک کے رشتے ڈھوئے ہیں

تم کو کیا معلوم مری تنہائی نے

لفظوں میں اپنے جذبات سموئے ہیں

ہم کیا جانیں خوابوں کی نرمی کیا ہے

ہم کب خوشبو کی بانہوں میں سوئے ہیں

بہا نہ لے جائے ان کو بارش اوشاؔ

چٹانوں پر خواب وفا کے بوئے ہیں

aksar tanhai se mil kar roe hain

ham ne apne ashk ag se dhoe hain

bahut nibhai len din ki rasmen bhi

kuchh ansu pae hain kuchh gham khoe hain

jab bhi barish ne mitti se munh mora

jalte suraj ne zarrat bhigoe hain

khabar jahan milti hai apne hone ki

ham is manzil par bhi khoe khoe hain

jab khud ko pana hi mushkil kam hua

kyun kachche dhage mein phul piroe hain

bal-o-par pate hi ure hawaon mein

ham ne jo nazdik ke rishte dhoe hain

tum ko kya maalum miri tanhai ne

lafzon main apne jazbat samoe hain

ham kya janen khwabon ki narmi kya hai

ham kab khushbu ki banhon mein soe hain

baha na le jae un ko barish usha

chatanon par khwab wafa ke boe hain