آسماں سے صحیفے اترتے رہے

آسماں سے صحیفے اترتے رہے

روشنی سے مگر لوگ ڈرتے رہے

زندگی اتنی مجبور سی ہو گئی

حادثے مجھ کو اشکوں سے بھرتے رہے

جن کو سب کچھ ملا ان کو سب کچھ ملا

جو بکھرتے رہے بس بکھرتے رہے

بن گئیں جب بھی ہم راز تنہائیاں

دل کی ہر بات ہم دل سے کرتے رہے

آتے جاتے نظر تجھ سے ملتی رہی

آئنہ زاویوں پر ابھرتے رہے

چند یادیں کھلیں اور مرجھا گئیں

بس ہواؤں میں ذرے بکھرتے رہے

آپ آتے رہے گیت گاتے رہے

گھر کے دیوار و در بھی سنورتے رہے

کچھ بھی ٹوٹا نہیں کچھ بھی بکھرا نہیں

حادثے راستوں سے گزرتے رہے

کب کیا ہم نے اوشاؔ کسی سے گلہ

خود میں جیتے رہے خود میں مرتے رہے

asman se sahife utarte rahe

raushni se magar log darte rahe

zindagi itni majbur si ho gai

hadse mujh ko ashkon se bharte rahe

jin ko sab kuchh mila un ko sab kuchh mila

jo bikharte rahe bas bikharte rahe

ban gain jab bhi ham raz tanhaiyan

dil ki har bat ham dil se karte rahe

ate jate nazar tujh se milti rahi

aina zawiyon par ubharte rahe

chand yaden khulen aur murjha gain

bas hawaon mein zarre bikharte rahe

ap ate rahe git gate rahe

ghar ke diwar-o-dar bhi sanwarte rahe

kuchh bhi tuta nahin kuchh bhi bikhra nahin

hadse raston se guzarte rahe

kab kiya ham ne usha kisi se gila

khud mein jite rahe khud mein marte rahe