آئنہ سے بات کرنا اتنا آساں بھی نہیں

آئنہ سے بات کرنا اتنا آساں بھی نہیں

عکس کی تہہ سے ابھرنا اتنا آساں بھی نہیں

خواہشیں سینے میں اگ آتی ہیں جنگل کی طرح

زندگی بانہوں میں بھرنا اتنا آساں بھی نہیں

اپنے ہی قدموں کی آہٹ جس جگہ چبھنے لگے

ایسی راہوں سے گزرنا اتنا آساں بھی نہیں

جانتی ہوں میں جدا ہے میرے خوابوں کا مزاج

ان اجالوں میں سنورنا اتنا آساں بھی نہیں

ساتھ رہتا ہے ہمیشہ تیرا غم تیرا خیال

اب ہوا معلوم مرنا اتنا آساں بھی نہیں

کیسی کیسی اونچی دیواریں کھڑی ہیں ہر طرف

دل میں جو ہے کر گزرنا اتنا آساں بھی نہیں

رکھ دیا ہے آپ کی چاہت نے مجھ کو جس جگہ

اس بلندی سے اترنا اتنا آساں بھی نہیں

سوچنا پڑتا ہے تنہائی میں خود کو بارہا

اپنے ہی سچ سے مکرنا اتنا آساں بھی نہیں

جانے اوشاؔ کتنے بندھن کتنے رشتے توڑ کر

دل کی خالی گود بھرنا اتنا آساں بھی نہیں

aina se bat karna itna asan bhi nahin

aks ki tah se ubharna itna asan bhi nahin

khwahishen sine mein ug ati hain jangal ki tarah

zindagi banhon mein bharna itna asan bhi nahin

apne hi qadmon ki ahat jis jagah chubhne lage

aisi rahon se guzarna itna asan bhi nahin

janti hun main juda hai mere khwabon ka mizaj

in ujalon mein sanwarna itna asan bhi nahin

sath rahta hai hamesha tera gham tera khayal

ab hua maalum marna itna asan bhi nahin

kaisi kaisi unchi diwaren khari hain har taraf

dil mein jo hai kar guzarna itna asan bhi nahin

rakh diya hai ap ki chahat ne mujh ko jis jagah

is bulandi se utarna itna asan bhi nahin

sochna parta hai tanhai mein khud ko barha

apne hi sach se mukarna itna asan bhi nahin

jane usha kitne bandhan kitne rishte tor kar

dil ki khali god bharna itna asan bhi nahin