اندھیری شب میں چراغ رہ وفا دینا

اندھیری شب میں چراغ رہ وفا دینا

تعلقات کو نزدیک سے صدا دینا

جہاں کھڑی ہوں وہاں سے پلٹ نہیں سکتی

ابھی نہ مجھ کو محبت کا واسطہ دینا

میں بے بسی کا سلیقہ نبھاؤں گی کب تک

بڑھے جو پیاس چراغ صدا بجھا دینا

بجھے بجھے سبھی منظر ہیں آشنائی کے

مرے لبوں کو کوئی حرف مدعا دینا

امید ہاتھ سے دامن اگر چھڑانے لگے

تو پھر مجھے بھی مرے شہر کا پتہ دینا

بھٹک نہ جاؤں کہیں غم کی رہ گزاروں میں

نگاہ و دل کو اجالوں کا راستہ دینا

رفاقتوں کو جو تنہائیاں ستانے لگیں

اداسیوں کو کوئی رنگ آشنا دینا

اگر تمہیں بھی کوئی اختیار مل جائے

تو پھر تڑپتے دلوں کو کہیں ملا دینا

لکھے ہیں اشکوں سے لمحات زندگی اوشاؔ

انہیں کتاب محبت میں تم سجا دینا

andheri shab mein charagh-e-rah-e-wafa dena

taalluqat ko nazdik se sada dena

jahan khari hun wahan se palat nahin sakti

abhi na mujh ko mohabbat ka wasta dena

main be basi ka saliqa nibhaungi kab tak

barhe jo pyas charagh-e-sada bujha dena

bujhe bujhe sabhi manzar hain ashnai ke

mire labon ko koi harf-e-muddaa dena

umid hath se daman agar chhurane lage

to phir mujhe bhi mire shahr ka pata dena

bhatak na jaun kahin gham ki rah guzaron mein

nigah-o-dil ko ujalon ka rasta dena

rifaqaton ko jo tanhaiyan satane lagen

udasiyon ko koi rang ashna dena

agar tumhen bhi koi ikhtiyar mil jae

to phir tarapte dilon ko kahin mila dena

likhe hain ashkon se lamhat-e-zindagi usha

unhen kitab-e-mohabbat mein tum saja dena