ستم کے بعد بھی باقی کرم کی آس تو ہے

ستم کے بعد بھی باقی کرم کی آس تو ہے

وفا شعار نہیں وہ وفا شناس تو ہے

وہ دل کی بات زباں سے نہ کچھ کہیں شاید

ہمارے حال پہ چہرہ مگر اداس تو ہے

یہ دل فریب بنارس کی صبح کا منظر

اودھ کی شام دل آرا ہمارے پاس تو ہے

بھرم رہے گا ترے مے کدے کا بھی ساقی

بلا سے خالی سہی ہاتھ میں گلاس تو ہے

چلے ہی جائیں نگاہوں سے دور آپ مگر

حسین یادوں کی دولت ہمارے پاس تو ہے

کرے بھلے ہی نہ رحمت کی مجھ پہ تو بارش

ترے کرم کی مرے دل میں ایک آس تو ہے

یہ سچ ہے اس نے بجھائی نہ تشنگی لیکن

ہماری تشنہ دہانی کا اس کو پاس تو ہے

درست ہے کہ فرشتہ صفت نہیں دانشؔ

خدا گواہ بصیرت کی اس کو پیاس تو ہے

sitam ke baad bhi baqi karam ki as to hai

wafa shiar nahin wo wafa shanas to hai

wo dil ki bat zaban se na kuchh kahin shayad

hamare hal pe chehra magar udas to hai

ye dil fareb banaras ki subh ka manzar

awadh ki sham dil ara hamare pas to hai

bharam rahega tire mai kade ka bhi saqi

bala se khali sahi hath mein gilas to hai

chale hi jaen nigahon se dur ap magar

hasin yadon ki daulat hamare pas to hai

kare bhale hi na rahmat ki mujh pe to barish

tire karam ki mire dil mein ek as to hai

ye sach hai us ne bujhai na tishnagi lekin

hamari tishna dahani ka us ko pas to hai

durust hai ke farishta sifat nahin danish

khuda gawah basirat ki us ko pyas to hai