جیتی رہو کہانیو ملتے ہیں یار ایک دن

جیتی رہو کہانیو ملتے ہیں یار ایک دن

ایک ہزار ایک رات ایک ہزار ایک دن

واقعی جیسے گمشدہ شخص پلٹ کے آ گیا

مجھ سے بسر نہیں ہوا ایک ہی بار ایک دن

خاک میں کم نمود کی آگ عدم وجود کی

عمر خیام ایک شب عمر خمار ایک دن

منزل جاں تک ایک دن پہنچے گا جو در اصل ہے

راہ میں بیٹھ جائے گا گرد و غبار ایک دن

وہ جسے ڈھونڈتی پھری تم نے چھپائی ڈائری

یاد ہے یار ایک بار یاد ہے یار ایک دن

آنکھ بچا کے لے گیا ہاتھ بڑھا کے لے گیا

رات کے پار ایک خواب خواب کے پار ایک دن

جھوٹی حقیقتوں سے دور سچی کہانیاں ضرور

جیتیں تو واپس آ سکیں شاہ سوار ایک دن

گاؤں سے گاؤں ڈاکئے لوگوں کے خط پڑھا کیے

میر امن ہوا کئے باغ و بہار ایک دن

بن کے بکھر تو جاؤں گا رو کے سنور تو جاؤں گا

خواب نگر تو جاؤں گا آخری بار ایک دن

باقی زمانے چھوڑ دے فانی فسانے چھوڑ دے

میری طرح سے میری جان خود پہ گزار ایک دن

یار کو گاڑ کر سبھی گاڑیوں کی طرف بڑھے

کٹتا نہ تھا ترے بغیر یاروں کے یار ایک دن

دنیا سے ایک دن وہ شخص دل کی طرف پھر آئے گا

شہر میں لوٹ آئے گی پھر سے بہار ایک دن

قصبے کی عورتیں جنے بچوں سنے بنے ٹھنے

ریل جہاں نہیں رکی کھوکھرا پار ایک دن

jiti raho kahaniyo milte hain yar ek din

ek hazar ek rat ek hazar ek din

waqai jaise gumshuda shakhs palat ke a gaya

mujh se basar nahin hua ek hi bar ek din

khak mein kam numud ki ag adam wajud ki

umr khayyam ek shab umr-e-khumar ek din

manzil-e-jan tak ek din pahunchega jo dar asl hai

rah mein baith jaega gard-o-ghubar ek din

wo jise dhundti phiri tum ne chhupai dairi

yad hai yar ek bar yad hai yar ek din

ankh bacha ke le gaya hath barha ke le gaya

rat ke par ek khwab khwab ke par ek din

jhuti haqiqaton se dur sachchi kahaniyan zarur

jiten to wapas a saken shah sawar ek din

gaon se gaon dakiye logon ke khat parha kiye

mir-e-amn hua kiye bagh-o-bahar ek din

ban ke bikhar to jaunga ro ke sanwar to jaunga

khwab nagar to jaunga akhiri bar ek din

baqi zamane chhor de fani fasane chhor de

meri tarah se meri jan khud pe guzar ek din

yar ko gar kar sabhi gariyon ki taraf barhe

katta na tha tire baghair yaron ke yar ek din

duniya se ek din wo shakhs dil ki taraf phir aega

shahr mein laut aegi phir se bahar ek din

qasbe ki auraten jane bachchon sune bane thane

rel jahan nahin ruki khokhara par ek din