سجدہ پیر مغاں حاصل عرفاں نکلا

سجدہ پیر مغاں حاصل عرفاں نکلا

جس کو ہم کفر سمجھتے تھے وہ ایماں نکلا

تا کجا خاک کی پرواز کا امکاں نکلا

فرش کیا عرش بھی جولانگہ انساں نکلا

شور سنتے تھے بہت نالۂ دل کا اپنے

یہ بھی آخر کو حریف غم پنہاں نکلا

عشق تو عشق ہے خود حسن بھی اس گلشن میں

چاک دل چاک جگر چاک گریباں نکلا

قید غم قید وفا قید نظر قید جنوں

گوشہ گوشہ چمن عشق کا دنداں نکلا

نہ ہوئی روح مکدر کبھی آلائش سے

شعلہ ہر دم خس و خاشاک سے عریاں نکلا

خار صحرا کی تمنا تھی کہ الجھیں لیکن

پیرہن میں نہ جنوں کے کوئی داماں نکلا

sajda pir-e-mughan hasil-e-irfan nikla

jis ko ham kufr samajhte the wo iman nikla

ta kuja khak ki parwaz ka imkan nikla

farsh kya arsh bhi julanigah insan nikla

shor sunte the bahut nala-e-dil ka apne

ye bhi akhir ko harif-e-gham-e-pinhan nikla

ishq to ishq hai khud husn bhi is gulshan mein

chak-e-dil chak-e-jigar chak-e-gareban nikla

qaid-e-gham qaid-e-wafa qaid-e-nazar qaid-e-junun

gosha gosha chaman-e-ishq ka dandan nikla

na hui ruh mukaddar kabhi alaish se

shola har dam khas-o-khashak se uryan nikla

khar-e-sahra ki tamanna thi ke uljhen lekin

pairahan mein na junun ke koi daman nikla