جگر کے خون سے تزئین بال و پر کر دی

جگر کے خون سے تزئین بال و پر کر دی

چمن اسیر نے یوں زندگی بسر کر دی

حکایت غم دل یوں بھی مختصر ہی تھی

تمہارے کہنے سے لو اور مختصر کر دی

مری وفا کی کہانی سے کون واقف تھا

تمہارے جور نے تشہیر در بدر کر دی

قدم بڑھاؤ کہ منزل قریب ہے شاید

تبھی تو راہ حریفوں نے تنگ تر کر دی

یہ کس جہان تمنا کا پھر خیال آیا

کہ جس خیال نے ہر شے عزیز تر کر دی

شبان زلف کی باتیں طلوع رخ کی خیر

تمام عمر عبادت میں مختصر کر دی

نئے ہیں جام و سبو بادہ و خمار نیا

اور ہم نے کہنہ شرابی میں شب سحر کر دی

بہت ہی خوب تھی روداد موسم ہستی

تری نگاہ کے سائے نے خوب تر کر دی

نہ منزلوں کی خبر ہے نہ راستوں کا پتا

متاع قلب و نظر نذر راہ پر کر دی

نئے شعور نئے فلسفے نئی اقدار

عیار عشق نے ہر کائنات سر کر دی

jigar ke khun se tazin-e-bal-o-par kar di

chaman asir ne yun zindagi basar kar di

hikayat-e-gham dil yun bhi mukhtasar hi thi

tumhare kahne se lo aur mukhtasar kar di

miri wafa ki kahani se kaun waqif tha

tumhare jaur ne tashhir dar badar kar di

qadam barhao ke manzil qarib hai shayad

tabhi to rah harifon ne tang tar kar di

ye kis jahan-e-tamanna ka phir khayal aya

ke jis khayal ne har shai aziz tar kar di

shabin zulf ki baten tulu-e-rukh ki khair

tamam umr ibadat mein mukhtasar kar di

nae hain jam-o-subu bada-o-khumar naya

aur ham ne kohna sharabi mein shab sahar kar di

bahut hi khub thi rudad mausam-e-hasti

tiri nigah ke sae ne khub tar kar di

na manzilon ki khabar hai na raston ka pata

mata-e-qalb-o-nazar nazr-e-rah par kar di

nae shuur nae falsafe nai aqdar

ayyar ishq ne har kainat sar kar di