ہوش و خرد کا راہ جنوں میں گزر نہیں

ہوش و خرد کا راہ جنوں میں گزر نہیں

یاں با خبر وہ ہے جسے اپنی خبر نہیں

کچھ اژدہام جلوہ سے آتا نظر نہیں

وہ پاس ہیں کہ دور یہ تجھ کو خبر نہیں

جوش جنون عشق کی تکمیل کے لئے

کیا کم ہے یہ کہ آہ میں میری اثر نہیں

ادراک کر لیا ہے وہاں عشق نے تجھے

احساس وہم کا بھی جہاں پر گزر نہیں

شبنم کا جذب چاہئے خورشید کا کرم

پرواز عشق منحصر بال و پر نہیں

دنیائے عشق میں دل ناآشنائے غم

ایسی بھی ایک شام ہے جس کی سحر نہیں

رگ رگ دل فسردہ کی مدت سے سرد ہے

اب خاکدان عشق میں کوئی شرر نہیں

وحشیؔ قدم قدم پہ یہاں سجدہ ریز ہو

کوئے حریم یار ہے یہ رہ گزر نہیں

hosh-o-khirad ka rah-e-junun mein guzar nahin

yan ba khabar wo hai jise apni khabar nahin

kuchh azhdaham-e-jalwa se ata nazar nahin

wo pas hain ke dur ye tujh ko khabar nahin

josh-e-junun-e-ishq ki takmil ke liye

kya kam hai ye ke ah mein meri asar nahin

idrak kar liya hai wahan ishq ne tujhe

ehsas wahm ka bhi jahan par guzar nahin

shabnam ka jazb chahiye khurshid ka karam

parwaz ishq munhasir-e-bal-o-par nahin

duniya-e-ishq mein dil-e-naashna-e-gham

aisi bhi ek sham hai jis ki sahar nahin

rag rag-e-dil fasurda ki muddat se sard hai

ab khakdan ishq mein koi sharar nahin

wahshi qadam qadam pe yahan sajda rez ho

ku-e-harim-e-yar hai ye rah guzar nahin