بوئے گل باغ میں برہم نظر آتی ہے مجھے

بوئے گل باغ میں برہم نظر آتی ہے مجھے

فصل گل صورت شبنم نظر آتی ہے مجھے

شمع امید کی لو باد حوادث میں بھی

اپنے مرکز پہ ہی ہر دم نظر آتی ہے مجھے

گرم رفتار ہیں خورشید و مہ و ارض و سما

زندگی جنبش پیہم نظر آتی ہے مجھے

غم و اندوہ و مصائب کے سیہ ابر میں بھی

اک تجلی ہے جو پیہم نظر آتی ہے مجھے

جانے کیا آج گلستاں میں پیام آیا ہے

آنکھ ہر پھول کی پر نم نظر آتی ہے مجھے

شام غم ہے یہ کہ ہے مطلع شام امید

روشنی تاروں کی مدھم نظر آتی ہے مجھے

نالۂ نیم شبی آہ و فغان سحری

ہر صدا عشق کی مبہم نظر آتی ہے مجھے

ہر در میکدۂ عشق کے آگے وحشیؔ

زہد و تقویٰ کی جبیں خم نظر آتی ہے مجھے

bu-e-gul bagh mein barham nazar ati hai mujhe

fasl-e-gul surat-e-shabnam nazar ati hai mujhe

sham-e-ummid ki lau bad-e-hawadis mein bhi

apne markaz pe hi har dam nazar ati hai mujhe

garm raftar hain khurshid-o-mah-o-arz-o-sama

zindagi jumbish-e-paiham nazar ati hai mujhe

gham-o-andoh-o-masaib ke siyah abr mein bhi

ik tajalli hai jo paiham nazar ati hai mujhe

jane kya aj gulistan mein payam aya hai

ankh har phul ki pur nam nazar ati hai mujhe

sham-e-gham hai ye ke hai matlaa sham-e-ummid

raushni taron ki maddham nazar ati hai mujhe

nala-e-nim shabi ah-o-fughan-e-sahari

har sada ishq ki mubham nazar ati hai mujhe

har dar-e-maikada-e-ishq ke age wahshi

zohd-o-taqwa ki jabin kham nazar ati hai mujhe