یوں ترنم ریز ہے ہر پردہ دل کے ساز کا

یوں ترنم ریز ہے ہر پردہ دل کے ساز کا

ہر نفس پر مجھ کو دھوکا ہے تری آواز کا

اک تجلی ہی تجلی ہر طرف پاتا ہوں میں

اللہ اللہ کیا اثر ہے حسن کے اعجاز کا

اضطراب دل کے صدمے سوز پنہاں کے نثار

آ گیا جنبش میں ہر پردہ حریم ناز کا

چشم حیرت مہر بر لب دل بہ آغوش حبیب

مختصر یہ حال ہے اب آشنائے راز کا

حشر سب کو سرمد و منصور کا معلوم ہے

کون حامل ہو سکے گا اب نوائے راز کا

yun tarannum rez hai har parda dil ke saz ka

har nafas par mujh ko dhoka hai tiri awaz ka

ik tajalli hi tajalli har taraf pata hun main

allah allah kya asar hai husn ke ejaz ka

iztirab-e-dil ke sadme soz-e-pinhan ke nisar

a gaya jumbish mein har parda harim-e-naz ka

chashm-e-hairat mehr bar lab dil ba aghosh-e-habib

mukhtasar ye hal hai ab ashna-e-raz ka

hashr sab ko sarmad-o-mansur ka maalum hai

kaun hamil ho sakega ab nawa-e-raz ka