کہیں نہ پھر کوئی دار و رسن سے ساز کرے

کہیں نہ پھر کوئی دار و رسن سے ساز کرے

خدا کسی کو نہ آب آشنائے راز کرے

کہاں تک آدمی حیل خرد سے ساز کرے

فضائے دہر کو اللہ جنوں نواز کرے

نہ پوچھ مرتبہ اس کے مقام عالی کا

جسے وہ فکر دوعالم سے بے نیاز کرے

حقیقتوں کی تجلی بھی پائے گا اس میں

جو روبرو کوئی آئینۂ مجاز کرے

نہیں ہے پختہ ابھی ذوق بندگی اس کا

حدود دیر و حرم میں جو امتیاز کرے

ہر ایک سانس میں سنتا ہے نغمۂ لاہوت

وہ جس کو گوش بر آواز نے نواز کرے

kahin na phir koi dar-o-rasan se saz kare

khuda kisi ko na ab ashna-e-raz kare

kahan tak admi hil-e-khirad se saz kare

faza-e-dahr ko allah junun nawaz kare

na puchh martaba us ke maqam-e-ali ka

jise wo fikr doalam se be niyaz kare

haqiqaton ki tajalli bhi paega is mein

jo rubaru koi aina-e-majaz kare

nahin hai pukhta abhi zauq-e-bandagi us ka

hudud-e-dair-o-haram mein jo imtiyaz kare

har ek sans mein sunta hai naghma-e-lahut

wo jis ko gosh bar awaz ne nawaz kare