مصیبت سر سے ٹلتی جا رہی ہے

مصیبت سر سے ٹلتی جا رہی ہے

ہماری عمر ڈھلتی جا رہی ہے

کہاں ہے زندگی اب زندگی میں

فقط اک نبض چلتی جا رہی ہے

مسلسل بھاپ بن کر اڑ رہا ہوں

مسلسل آگ جلتی جا رہی ہے

عجب ہے سانحہ جینے کی خواہش

مرے دل سے نکلتی جا رہی ہے

خفا کیوں ہیں مرے حالات مجھ سے

ہوا کیوں رخ بدلتی جا رہی ہے

یہ سانسیں معجزے میں ڈھل رہی ہیں

کرامت خوں میں چلتی جا رہی ہے

سوا نیزے پہ سورج آ رہا ہے

مری ہر سمت گلتی جا رہی ہے

مجھے دھر کر میرے بے در مکاں میں

وہ گھر کو ہاتھ ملتی جا رہی ہے

یہ کیسے ڈنک ہیں سینے میں طاہرؔ

حلق میں جاں اچھلتی جا رہی ہے

musibat sar se talti ja rahi hai

hamari umr dhalti ja rahi hai

kahan hai zindagi ab zindagi mein

faqat ik nabz chalti ja rahi hai

musalsal bhap ban kar ur raha hun

musalsal ag jalti ja rahi hai

ajab hai saneha jine ki khwahish

mire dil se nikalti ja rahi hai

khafa kyun hain mire halat mujh se

hawa kyun rukh badalti ja rahi hai

ye sansen mojize mein dhal rahi hain

karamat khun mein chalti ja rahi hai

siwa neze pe suraj a raha hai

miri har samt galti ja rahi hai

mujhe dhar kar mere be dar makan mein

wo ghar ko hath milti ja rahi hai

ye kaise dank hain sine mein tahir

halq mein jan uchhalti ja rahi hai