موجودگی کا اس کی یہاں اعتراف کر

موجودگی کا اس کی یہاں اعتراف کر

اے کعبۂ جہاں مرے دل کا طواف کر

کب تک فسوں میں موسم یکسانیت رہے

اے رائج الجہان نیا انکشاف کر

اس تلخیٔ حیات کے لمحوں کا ہر قصور

میں نے معاف کر دیا تو بھی معاف کر

پردہ پڑا ہے شہر کی جب آنکھ آنکھ پر

تیرا بھی حق ہے سچ سے مرے اختلاف کر

میں سچ ہوں اور سامنے تیرے کھڑا ہوں میں

کرنا ہے میری ذات سے اب انحراف کر

میں خود پہ اوڑھتا ہوں ترے پیار کی ردا

تو خود پہ میری چاہ کا اجلا غلاف کر

لے ایک ایک شخص مرا ہم زبان ہے

جا ایک ایک شخص کو میرے خلاف کر

تب عکس عکس اجلا نظر آئے گا تجھے

تو آئنۂ دل پہ جمی گرد صاف کر

بن کر شعاع شیشۂ منشور دل پہ پڑ

رنگوں کا اک جہان لیے انعطاف کر

چادر تمازتوں کی لیے دن کے دل میں چل

تنہائیوں کو شب کے جگر میں لحاف کر

اس مہر بند عشق کو تو بھی ہوا لگا

طاہر عدیمؔ تو بھی کوئی اکتشاف کر

maujudgi ka us ki yahan etiraf kar

ai kaaba-e-jahan mire dil ka tawaf kar

kab tak fusun mein mausam yaksaniyyat rahe

ai raij aljahan naya inkishaf kar

is talkhi-e-hayat ke lamhon ka har qusur

main ne muaf kar diya tu bhi muaf kar

parda para hai shahr ki jab ankh ankh par

tera bhi haq hai sach se mire ikhtilaf kar

main sach hun aur samne tere khara hun main

karna hai meri zat se ab inhiraf kar

main khud pe orhta hun tire pyar ki rida

tu khud pe meri chah ka ujla ghilaf kar

le ek ek shakhs mira ham zaban hai

ja ek ek shakhs ko mere khilaf kar

tab aks aks ujla nazar aega tujhe

tu aina-e-dil pe jami gard saf kar

ban kar shua-e-shisha-e-manshur dil pe par

rangon ka ik jahan liye initaf kar

chadar tamazaton ki liye din ke dil mein chal

tanhaiyon ko shab ke jigar mein lihaf kar

is mehr band-e-ishq ko tu bhi hua laga

tahir adim tu bhi koi aktashaf kar