بلا جواز نہیں ہے غرور آنکھوں میں

بلا جواز نہیں ہے غرور آنکھوں میں

بسا ہوا ہے کوئی تو ضرور آنکھوں میں

تسلیوں کا چراغاں شفیق ہونٹوں پر

محبتوں کی انوکھی سطور آنکھوں میں

وضوئے دید جدائی میں بھی میسر ہے

ہیں گرچہ دور مگر ہیں حضور آنکھوں میں

کہ رات دودھیا چادر میں خواب لپٹے تھے

تمام دن تھا رہا اس کا نور آنکھوں میں

رکے ہوئے کسی سیلاب کی سفارت کو

کیا ہے اشک نے پھر سے ظہور آنکھوں میں

جیا ہے دشت دل و جاں حد معین میں

کیا ہے آنکھ کا دریا عبور آنکھوں میں

خمار درد میں طاہر عدیمؔ سب مسرور

ہیں مستیاں سی سروں میں سرور آنکھوں میں

bala jawaz nahin hai ghurur ankhon mein

basa hua hai koi to zarur ankhon mein

tasalliyon ka charaghan shafiq honton par

mohabbaton ki anokhi sator ankhon mein

wuzu-e-did judai mein bhi muyassar hai

hain garche dur magar hain huzur ankhon mein

ke rat dudhiya chadar mein khwab lipte the

tamam din tha raha us ka nur ankhon mein

ruke hue kisi sailab ki sifarat ko

kya hai ashk ne phir se zuhur ankhon mein

jiya hai dasht-e-dil-o-jan had muin mein

kya hai ankh ka dariya ubur ankhon mein

khumar dard mein tahir adim sab masrur

hain mastiyan si saron mein surur ankhon mein