اسیر بحر و بر کوئی نہیں ہے

اسیر بحر و بر کوئی نہیں ہے

جہاں میں مختصر کوئی نہیں ہے

ہے دھڑکا سا مرے سینے میں لیکن

در امید پر کوئی نہیں ہے

مرا سایا سمٹ آیا ہے مجھ میں

مرا اب ہم سفر کوئی نہیں ہے

حوادث بھی وہیں ہم بھی وہیں ہیں

مگر اب چشم تر کوئی نہیں ہے

نظر ہی بام پر میری نہیں یا

نظر کے بام پر کوئی نہیں ہے

بجز میرے یہاں میری وفا کا

حوالہ معتبر کوئی نہیں ہے

سمجھ کر سوچ کر دل میں اترنا

یہاں باہر کو در کوئی نہیں ہے

خرد کے لاکھ قاصد ہیں تو ہوں گے

جنوں کا نامہ بر کوئی نہیں ہے

مجھے اپنانے والے لوگ طاہرؔ

بہت سے ہیں مگر کوئی نہیں ہے

asir-e-bahr-o-bar koi nahin hai

jahan mein mukhtasar koi nahin hai

hai dharka sa mire sine mein lekin

dar-e-ummid par koi nahin hai

mira saya simat aya hai mujh mein

mira ab ham safar koi nahin hai

hawadis bhi wahin ham bhi wahin hain

magar ab chashm-e-tar koi nahin hai

nazar hi bam par meri nahin ya

nazar ke bam par koi nahin hai

bajuz mere yahan meri wafa ka

hawala motabar koi nahin hai

samajh kar soch kar dil mein utarna

yahan bahar ko dar koi nahin hai

khirad ke lakh qasid hain to honge

junun ka nama bar koi nahin hai

mujhe apnane wale log tahir

bahut se hain magar koi nahin hai