نہ دیواریں ہیں اور نہ در پرانا

نہ دیواریں ہیں اور نہ در پرانا

ابھی تک پھر بھی ہے یہ گھر پرانا

ڈرا دیتا جگا دیتا ہے مجھ کو

درون ذہن بیٹھا ڈر پرانا

مراحل آخری تعلیم کے ہیں

مری ماں نے نکالا زر پرانا

تماشا پھر وہی امسال ہوگا

وہی دستار ہوگی سر پرانا

سجا ماتم کنار دشت مژگاں

سنا قصہ وہ چشم تر پرانا

اگر ہے دسترس دست سخاوت

ملا دے یار لمحہ بھر پرانا

اگر آ ہی گیا ہے وہ تو طاہرؔ

شکایت کر نہ شکوہ کر پرانا

na diwaren hain aur na dar purana

abhi tak phir bhi hai ye ghar purana

dara deta jaga deta hai mujh ko

darun-e-zehn baitha dar purana

marahil akhiri taalim ke hain

miri man ne nikala zar purana

tamasha phir wahi imsal hoga

wahi dastar hogi sar purana

saja matam kanar-e-dasht-e-mizhgan

suna qissa wo chashm-e-tar purana

agar hai dastaras dast-e-sakhawat

mila de yar lamha bhar purana

agar a hi gaya hai wo to tahir

shikayat kar na shikwa kar purana