اپنا کردار بچانے میں لہو لگتا ہے

اپنا کردار بچانے میں لہو لگتا ہے

زندگی تیرے فسانے میں لہو لگتا ہے

ہجر کی آگ شرابوں سے کہاں بجھتی ہے

ہجر کی آگ بجھانے میں لہو لگتا ہے

خون تھوکواتا ہے ہر بار ترا نام مجھے

تجھ کو آواز لگانے میں لہو لگتا ہے

یہ وہ دنیا ہے جہاں آنے میں آسانی ہے

ہاں مگر لوٹ کے جانے میں لہو لگتا ہے

اس لئے بھی میں بجھا رکھتا ہوں ماضی کے چراغ

ان چراغوں کو جلانے میں لہو لگتا ہے

اور تصویریں تو بنتی ہیں فقط رنگوں سے

اس کی تصویر بنانے میں لہو لگتا ہے

جن کی رگ رگ میں ہو پانی وہ محبت نہ کریں

اس محبت کو نبھانے میں لہو لگتا ہے

apna kirdar bachane mein lahu lagta hai

zindagi tere fasane mein lahu lagta hai

hijr ki ag sharabon se kahan bujhti hai

hijr ki ag bujhane mein lahu lagta hai

khun thukoita hai har bar tira nam mujhe

tujh ko awaz lagane mein lahu lagta hai

ye wo duniya hai jahan ane mein asani hai

han magar laut ke jane mein lahu lagta hai

is liye bhi main bujha rakhta hun mazi ke charagh

in charaghon ko jalane mein lahu lagta hai

aur taswiren to banti hain faqat rangon se

us ki taswir banane mein lahu lagta hai

jin ki rag rag mein ho pani wo mohabbat na karen

is mohabbat ko nibhane mein lahu lagta hai