آخر وہ اضطراب کے دن بھی گزر گئے

آخر وہ اضطراب کے دن بھی گزر گئے

جب دل حریف آتش قہر و عتاب تھا

جاں دوستوں کی چارہ گری سے لبوں پہ تھی

سر دشمنوں کی سنگ زنی سے عذاب تھا

دامن سگان کوئے محبت سے تار تار

چہرہ خراش دست جنوں سے خراب تھا

واں اعتماد مشق سیاست کی حد نہ تھی

یاں اعتبار‌ نالۂ دل بے حساب تھا

ہر بات صوفیوں کی طرح پیچ و خم لئے

ہر لفظ شاعروں کی طرح انتخاب تھا

ہر جلوہ ایک دفتر آشوب روزگار

ہر غمزہ علم فتنہ گری کی کتاب تھا

خوابیدہ ہر نظر میں بنائے فساد خلق

پوشیدہ ہر روش میں نیا انقلاب تھا

آج اس غزل میں ہم پہ قیامت گزر گئی

کیا گرمیٔ خیال تھی کیا التہاب تھا

akhir wo iztirab ke din bhi guzar gae

jab dil harif-e-atish-e-qahr-o-itab tha

jan doston ki chara giri se labon pe thi

sar dushmanon ki sang zani se azab tha

daman sagin ku-e-mohabbat se tar tar

chehra kharash-e-dast-e-junun se kharab tha

wan etimad mashq siyasat ki had na thi

yan etibar nala-e-dil be hisab tha

har bat sufiyon ki tarah pech-o-kham liye

har lafz shayaron ki tarah intikhab tha

har jalwa ek daftar-e-ashob-e-rozgar

har ghamza ilm fitna giri ki kitab tha

khwabida har nazar mein banae fasad-e-khalq

poshida har rawish mein naya inqilab tha

aj is ghazal mein ham pe qayamat guzar gai

kya garmi-e-khayal thi kya iltihab tha