بہت دنوں میں ہم ان سے جو ہم کلام ہوئے

بہت دنوں میں ہم ان سے جو ہم کلام ہوئے

دل و نظر ہمہ تن سجدہ و سلام ہوئے

ہنوز جیسے مسیحا کی آمد آمد ہے

اگرچہ عمر ہوئی زندگی تمام ہوئے

شفق سی خیمۂ جاناں کی سمت باقی ہے

تمام وادی و کہسار غرق شام ہوئے

کئی گلے تھے جو شور جہاں میں ڈوب گئے

کئی ستم تھے جو احسان بن کے عام ہوئے

کسی طرف جنہیں راہ گناہ مل نہ سکی

کچھ ایسے لوگ بھی دنیا میں نیک نام ہوئے

افق کے پار کہیں سے لہو اچھلتا ہے

زمیں سے دور بھی کیا کیا نہ قتل عام ہوئے

چلے تھے ان سے مصیبت میں ہم گلہ کرنے

کچھ اور مورد تضحیک خاص و عام ہوئے

رہ طلب میں نئے ریگزار تک پہنچے

وہ تشنہ کام جو صحرا میں تیز گام ہوئے

bahut dinon mein ham un se jo ham kalam hue

dil-o-nazar hama tan sajda-o-salam hue

hanoz jaise masiha ki amad amad hai

agarche umr hui zindagi tamam hue

shafaq si khema-e-janan ki samt baqi hai

tamam wadi-o-kohsar gharq-e-sham hue

kai gale the jo shor jahan mein dub gae

kai sitam the jo ehsan ban ke am hue

kisi taraf jinhen rah-e-gunah mil na saki

kuchh aise log bhi duniya mein nek nam hue

ufuq ke par kahin se lahu uchhalta hai

zamin se dur bhi kya kya na qatl-e-am hue

chale the un se musibat mein ham gila karne

kuchh aur muwarrad tazhik-e-khas-o-am hue

rah-e-talab mein nae regzar tak pahunche

wo tishna kam jo sahra mein tez gam hue