اے صبا نکہت‌ گیسوۓ معنبر لانا

اے صبا نکہت‌ گیسوۓ معنبر لانا

کوئی تحفہ گل‌ و نسرین سے خوشتر لانا

شبنمستان محبت کی حسیں راہوں سے

خنکیٔ شبنم و نور مہ و اختر لانا

جاں بہ لب ہیں ترے مشتاق سر راہ حیات

دم عیسی و مئے لعل و گل تر لانا

عشق ہو مست و غزلخوان و صراحی بر دوش

زندگی تازہ و سرشار و معطر لانا

در خور محفل و شایان خرابات مغاں

آتشیں مطرب و بیباک نواگر لانا

تجھ کو اندوہ اسیران قفس کی سوگند

آرزوؤں کے حسیں پھول کھلا کر لانا

کشتگان ستم دور خزاں ہیں ہم لوگ

اپنے ہم راہ بہاروں کا پیمبر لانا

اس نئے دور کے شعروں میں تغزل کم ہے

میری افتاد طبیعت کا سخنور لانا

ai saba nikhat-e-gesu-e-muambar lana

koi tohfa gul-o-nasrain se khushtar lana

shabnamsitan mohabbat ki hasin rahon se

khunuki-e-shabnam-o-nur-e-mah-o-akhtar lana

jan ba lab hain tire mushtaq sar-e-rah-e-hayat

dam-e-isa-o-mai-e-laal-o-gul-e-tar lana

ishq ho mast-o-ghazalkhwan-o-surahi bar dosh

zindagi taza-o-sarshar-o-muattar lana

dar-e-khur mahfil-o-shayan-e-kharabat-e-mughan

atishin mutrib-o-bebak nawagar lana

tujh ko andoh asiran-e-qafas ki saugand

arzuon ke hasin phul khula kar lana

kishtgan-e-sitam daur-e-khizan hain ham log

apne ham rah baharon ka payambar lana

is nae daur ke sheron mein taghazzul kam hai

meri uftad tabiat ka sukhanwar lana