بجز متاع دل لخت لخت کچھ بھی نہیں

بجز متاع دل لخت لخت کچھ بھی نہیں

مری نگاہ میں تدبیر و بخت کچھ بھی نہیں

گزرتے وقت کی صورت حریف بھی نہ رہے

بری نگاہ نہ لہجے کرخت کچھ بھی نہیں

مسافتوں کی گھنی دھوپ میں ہیں تنہا ہم

ہماری راہ میں سائے درخت کچھ بھی نہیں

میں نقش و رنگ کی دنیا لٹا کے آیا ہوں

مری نگاہ میں اب تاج و تخت کچھ بھی نہیں

ہمیں رئیسؔ جو لوٹے تو کوئی کیا لوٹے

ہمارے پاس تو اب ساز و رخت کچھ بھی نہیں

bajuz mata-e-dil lakht lakht kuchh bhi nahin

miri nigah mein tadbir-o-bakht kuchh bhi nahin

guzarte waqt ki surat harif bhi na rahe

buri nigah na lahje karakht kuchh bhi nahin

masafaton ki ghani dhup mein hain tanha ham

hamari rah mein sae darakht kuchh bhi nahin

main naqsh-o-rang ki duniya luta ke aya hun

miri nigah mein ab taj-o-takht kuchh bhi nahin

hamen rais jo laute to koi kya laute

hamare pas to ab saz-o-rakht kuchh bhi nahin