گو دور ہو چکا ہوں یاران انجمن سے

گو دور ہو چکا ہوں یاران انجمن سے

لیکن مفر نہیں ہے احساس کی چبھن سے

حسن نظر کا جادو سر چڑھ کے بولتا ہے

اصنام مرمریں بھی لگتے ہیں سیم تن سے

غنچہ ہی پھول بن کر جان چمن ہوا ہے

میں نے یقیں کی دولت پائی ہے حسن ظن سے

آج ان کے راستوں میں کانٹے بچھے ہوئے ہیں

کل تک جو کھیلتے تھے رنگینئ‌ چمن سے

جیسے چمن سے نکہت جیسے صدف سے موتی

ایسے جدا ہوا ہوں میں جنت وطن سے

میں راز رنگ و بو سے نا آشنا نہیں ہوں

مجھ کو گلہ بھی کب ہے پھولوں کی انجمن سے

میری غزل عروجؔ اک تصویر عصر نو ہے

میں نے اسے سنوارا تہذیب فکر و فن سے

go dur ho chuka hun yaran-e-anjuman se

lekin mafar nahin hai ehsas ki chubhan se

husn-e-nazar ka jadu sar charh ke bolta hai

asnam-e-marmarin bhi lagte hain sim tan se

ghuncha hi phul ban kar jan-e-chaman hua hai

main ne yaqin ki daulat pai hai husn-e-zan se

aj un ke raston mein kante bichhe hue hain

kal tak jo khelte the rangini-e-chaman se

jaise chaman se nikhat jaise sadaf se moti

aise juda hua hun main jannat-e-watan se

main raz-e-rang-o-bu se na ashna nahin hun

mujh ko gila bhi kab hai phulon ki anjuman se

meri ghazal uruj ik taswir asr-e-nau hai

main ne use sanwara tahzib-e-fikr-o-fan se