یہ مری ایجاد اظہار تمنا دیکھیے

یہ مری ایجاد اظہار تمنا دیکھیے

شبنمی آنکھوں کا در پردہ تقاضا دیکھیے

صرف دو آنکھیں ملی ہیں ان سے کیا کیا دیکھیے

ہر نفس ہر گام پر نیرنگ دنیا دیکھیے

بے خودیٔ شوق کا تازہ کرشمہ دیکھیے

دیکھیے مجھ کو بھری محفل میں تنہا دیکھیے

محور حسن زمیں کل تک مرا ہر شعر تھا

اب مرے افکار کو افلاک پیما دیکھیے

نکتہ چینی عیب جوئی کا گلہ بے کار ہے

آپ سے کس نے کہا تھا ذہن دنیا دیکھیے

ان لبوں پر صرف تحریک تبسم کے لئے

تاب نظارہ کو رسوا اور رسوا دیکھیے

جنبش پردہ سے ہیں اوسان گم ادراک گم

اور اس عالم میں یہ تاکید جلوہ دیکھیے

آپ کا نقد تماشا معتبر ہو جائے گا

اپنا چہرہ دیکھ کر اوروں کا چہرہ دیکھیے

امتیاز خاص و عام اس کی شعاعوں پر حرام

غیر جانب دار سورج کا اجالا دیکھیے

میرا سایہ بھی اندھیرے میں نہیں ہے ہم قدم

سوچنا پڑتا ہے اب کس کا سہارا دیکھیے

فطرت تصویر بھی ان کی طرح محتاط ہے

آپ اس سے خواہ باتیں کیجیے یا دیکھیے

تشنگی تیغوں کے سائے دھوپ غربت اے عروجؔ

آپ نے سجدہ کہاں دیکھا ہے سجدہ دیکھیے

ye miri ijad-e-izhar-e-tamanna dekhiye

shabnami ankhon ka dar parda taqaza dekhiye

sirf-e-do ankhen mili hain un se kya kya dekhiye

har nafas har gam par nairang duniya dekhiye

be khudi-e-shauq ka taza karishma dekhiye

dekhiye mujh ko bhari mahfil mein tanha dekhiye

mehwar-e-husn-e-zamin kal tak mira har sher tha

ab mire afkar ko aflak paima dekhiye

nukta chini aib joi ka gila be kar hai

ap se kis ne kaha tha zehn duniya dekhiye

un labon par sirf tahrik-e-tabassum ke liye

tab-e-nazzara ko ruswa aur ruswa dekhiye

jumbish-e-parda se hain ausan gum idrak gum

aur is alam mein ye takid jalwa dekhiye

ap ka naqd-e-tamasha motabar ho jaega

apna chehra dekh kar auron ka chehra dekhiye

imtiyaz-e-khas-o-am us ki shuaon par haram

ghair janib dar suraj ka ujala dekhiye

mera saya bhi andhere mein nahin hai ham qadam

sochna parta hai ab kis ka sahara dekhiye

fitrat-e-taswir bhi un ki tarah mohtat hai

ap us se khwah baten kijiye ya dekhiye

tishnagi teghon ke sae dhup ghurbat ai uruj

ap ne sajda kahan dekha hai sajda dekhiye