بے نیازی کی اک شان بن جائیے

بے نیازی کی اک شان بن جائیے

مجھ سے دانستہ انجان بن جائیے

شرح ہستی کا عنوان بن جائیے

میرا دیں میرا ایمان بن جائیے

ہائے یہ بے خودی اور اس کا مآل

اب خودی کے نگہبان بن جائیے

نقد اہل جہاں دیکھنے کے لیے

کچھ دنوں کو پریشان بن جائیے

آدمی سے فرشتہ یہ امکاں سہی

آئیے آپ انسان بن جائیے

کیا کمی ہے جو ان سے گزارش کروں

رنگ و نکہت کا طوفان بن جائیے

مہر تصدیق کردار بھی ہے کہیں

آپ بننے کو ذیشان بن جائیے

کائنات اور پھر اس کا عکس جمال

پیش آئینہ حیران بن جائیے

عارفانہ تجاہل کے قرباں عروجؔ

پھر ذرا آپ انجان بن جائیے

be niyazi ki ik shan ban jaiye

mujh se danista anjan ban jaiye

sharh-e-hasti ka unwan ban jaiye

mera den mera iman ban jaiye

hae ye be khudi aur us ka maal

ab khudi ke nigahban ban jaiye

naqd ahl-e-jahan dekhne ke liye

kuchh dinon ko pareshan ban jaiye

admi se farishta ye imkan sahi

aiye ap insan ban jaiye

kya kami hai jo un se guzarish karun

rang-o-nikhat ka tufan ban jaiye

mehr-e-tasdiq kirdar bhi hai kahin

ap banne ko zishan ban jaiye

kainat aur phir us ka aks-e-jamal

pesh-e-aina hairan ban jaiye

arifana tajahul ke qurban uruj

phir zara ap anjan ban jaiye