رعایا دے رہی تھی شوق سے بیگار جسموں کی

رعایا دے رہی تھی شوق سے بیگار جسموں کی

یہی تقدیر ہے آقا یہاں نادار جسموں کی

گرا ڈالے گی تجھ پہ آسماں جو سرسراہٹ ہے

تمہارے پاؤں نیچے رینگتے بیدار جسموں کی

مؤرخ گولیوں کے خول گنتے جا رہے تھے اور

حکایت لکھ رہے تھے ہم یہاں مسمار جسموں کی

محبت صرف کہنے کو تعلق تیل پانی سا

ریاضت عمر بھر کرتے رہے بیکار جسموں کی

خدا تیرا نظام عدل رب العالمیں تیرا

شریعت تجھ کو دیتی ہے اجازت چار جسموں کی

اسے تو فکر دامن گیر تھی شہہ کے قصیدے کی

کہانی اک طرف رکھی رہی بیمار جسموں کی

بدن چھوڑو صباحت ہو سکے تو روح کو تھامو

کوئی دم گرنے والی ہے یہاں دیوار جسموں کی

riaya de rahi thi shauq se begar jismon ki

yahi taqdir hai aqa yahan nadar jismon ki

gira dalegi tujh pe asman jo sarsarahat hai

tumhare paon niche rengte bedar jismon ki

muarrikh goliyon ke khol ginte ja rahe the aur

hikayat likh rahe the ham yahan mismar jismon ki

mohabbat sirf kahne ko taalluq tel pani sa

riyazat umr bhar karte rahe bekar jismon ki

khuda tera nizam-e-adl rab-e-alalamin tera

shariat tujh ko deti hai ijazat char jismon ki

use to fikr-e-daman gir thi shah ke qaside ki

kahani ik taraf rakhi rahi bimar jismon ki

badan chhoro sabahat ho sake to ruh ko thamo

koi dam girne wali hai yahan diwar jismon ki