ہم کو خوش رہنے کی اکثر جو دعا دیتے ہیں

ہم کو خوش رہنے کی اکثر جو دعا دیتے ہیں

غم کا سامان بھی وہ خود ہی بنا دیتے ہیں

سر جھکاؤ تو خوشامد ہے اٹھاؤ تو غرور

جانے کس بیچ کے رستے کا پتا دیتے ہیں

ان کے چہرے سے ٹپکتا ہے چھپا بغض و عناد

درس دنیا کو محبت کا وہ کیا دیتے ہیں

ہم ضرورت میں کبھی کام تھے آئے جن کے

ہم کو وہ پہلو تہی کر کے صلہ دیتے ہیں

بے تکلف ہیں مگر ہم بھی انہیں جانتے ہیں

وقت پڑنے پہ وہ کس طرح دغا دیتے ہیں

رائیگاں ٹھہرے سبھی آنکھ سے ٹپکے آنسو

دل پہ گرتے ہیں تو احساس نیا دیتے ہیں

ham ko khush rahne ki aksar jo dua dete hain

gham ka saman bhi wo khud hi bana dete hain

sar jhukao to khushamad hai uthao to ghurur

jane kis bech ke raste ka pata dete hain

un ke chehre se tapakta hai chhupa bughz-o-inad

dars-e-duniya ko mohabbat ka wo kya dete hain

ham zarurat mein kabhi kam the ae jin ke

ham ko wo pahlu tahi kar ke sila dete hain

be takalluf hain magar ham bhi unhen jante hain

waqt parne pe wo kis tarah dagha dete hain

raigan thahre sabhi ankh se tapke ansu

dil pe girte hain to ehsas naya dete hain