کسی کے ساتھ دینے کا کوئی امکاں نہیں ہوتا

کسی کے ساتھ دینے کا کوئی امکاں نہیں ہوتا

وسیع القلب ہونا اس قدر آساں نہیں ہوتا

بچھڑتے وقت اک آنسو پس مژگاں نہیں ہوتا

مگر یہ حوصلہ اس درد کا درماں نہیں ہوتا

جدائی کا تأثر مجھ پہ کچھ ہے آپ پر کچھ ہے

اثر ہر بات کا ہر شخص پر یکساں نہیں ہوتا

مرا دل اپنے ہی احساس کی شدت گنوا بیٹھا

تمہاری بات کا افسوس اب چنداں نہیں ہوتا

تضاد اپنی طبیعت کا مزاج اس کی محبت کا

ہر اندیشہ بہ وجہ گردش دوراں نہیں ہوتا

سمندر کی تہیں اور آسماں کی سب حدیں چھو لیں

مگر انساں کو اپنی ذات کا عرفاں نہیں ہوتا

نسیمؔ اپنے لئے تم نے دعا بھی ترک کر ڈالی

تو کیا اب خود سے ملنے کا تمہیں ارماں نہیں ہوتا

kisi ke sath dene ka koi imkan nahin hota

wasi alqalb hona is qadar asan nahin hota

bichharte waqt ik ansu pas mizhgan nahin hota

magar ye hausla is dard ka darman nahin hota

judai ka tasar mujh pe kuchh hai ap par kuchh hai

asar har bat ka har shakhs par yaksan nahin hota

mira dil apne hi ehsas ki shiddat ganwa baitha

tumhari bat ka afsos ab chandan nahin hota

tazad apni tabiat ka mizaj us ki mohabbat ka

har andesha ba wajh-e-gardish-e-dauran nahin hota

samundar ki tahen aur asman ki sab haden chhu len

magar insan ko apni zat ka irfan nahin hota

nasim apne liye tum ne dua bhi tark kar dali

to kya ab khud se milne ka tumhen arman nahin hota