سوال شام پہ آیا جواب شب آخر

سوال شام پہ آیا جواب شب آخر

کشیدگی کا نہ پایا مگر سبب آخر

تمہارے غم مرے خواہاں نہ میرا اپنا وجود

کہاں سے لاؤں گی میں شدت طلب آخر

عنایت ان کی جو وہ حال پوچھ لیں ورنہ

کسی سے ان کے مراسم ہوئے ہیں کب آخر

محبتوں کی روایت تو کائنات میں ہے

تمہاری آنکھ ہے اول نہ میرے لب آخر

تمہارے نام سخن اور تم نہیں سمجھے

ہمارے شعر ہوئے حصۂ ادب آخر

نہیں ملا کوئی یہ بات پوچھنے والا

بنا لیا ہے یہ کیا زندگی کا ڈھب آخر

اڑا جو طائر ہستی تو پھر نہ ٹھہرے گا

نسیمؔ کر تو سہی کوشش طرب آخر

sawal-e-sham pe aya jawab-e-shab akhir

kashidagi ka na paya magar sabab akhir

tumhare gham mire khwahan na mera apna wajud

kahan se laungi mein shiddat-e-talab akhir

inayat un ki jo wo hal puchh len warna

kisi se un ke marasim hue hain kab akhir

mohabbaton ki riwayat to kainat mein hai

tumhari ankh hai awwal na mere lab akhir

tumhare nam-e-sukhan aur tum nahin samjhe

hamare sher hue hissa-e-adab akhir

nahin mila koi ye bat puchhne wala

bana liya hai ye kya zindagi ka dhab akhir

ura jo tair-e-hasti to phir na thahrega

nasim kar to sahi koshish-e-tarab akhir