Arooz is now on the App Store, for iPhone and iPad. Download →

All poetry

تمہارے خواب کی تعبیر ہو جاؤں اجازت ہے

SabeenSaif

تمہارے خواب کی تعبیر ہو جاؤں اجازت ہے

محبت کی میں اک تصویر ہو جاؤں اجازت ہے

کہیں جانے نہ دوں تم کو اگر تم میرے ہو جاؤ

تمہارے پاؤں کی زنجیر ہو جاؤں اجازت ہے

کسی کے ہو گئے ہو تم مجھے شکوہ نہیں کوئی

کسی کی میں بھی اب جاگیر ہو جاؤں اجازت ہے

وہ اک تعویذ جو تم نے گلے میں ڈال رکھا ہے

میں اس تعویذ کی تحریر ہو جاؤں اجازت ہے

زمانے کے میں ہر اک وار سے تجھ کو بچا لوں گی

میں تیرے ہاتھ میں شمشیر ہو جاؤں اجازت ہے

تجھے یہ معجزہ بھی میں دکھا سکتی ہوں دنیا میں

جو تو چاہے تری تقدیر ہو جاؤں اجازت ہے

خدا نے یہ کرشمہ چاہتوں کو سونپ رکھا ہے

میں اک پل میں تری توقیر ہو جاؤں اجازت ہے