بہت قریب تھا پر مہرباں نہ تھا میرا — SabeenSaif

Arooz is now on the App Store, for iPhone and iPad. Download →

بہت قریب تھا پر مہرباں نہ تھا میرا

بھری بہار میں اک آشیاں نہ تھا میرا

لبادہ روح کا چھلنی تھا جابجا لیکن

مرے قریب کوئی مہرباں نہ تھا میرا

لہو میں بہتا ہے لیکن یہ احتیاط جنوں

کہ راز دل کا نظر سے عیاں نہ تھا میرا

میں خوش گماں جسے جاگیر سمجھے بیٹھی تھی

کہ دل پہ اس کے کہیں بھی نشاں نہ تھا میرا

وہ دشت ذات میں برگد کا پیڑ تھا لیکن

جھلستی دھوپ میں وہ سائباں نہ تھا میرا

یہ اور بات مرے حال سے تھا ناواقف

میں کیسے کہہ دوں کہ وہ راز داں نہ تھا میرا

بنا تھا ترک تعلق کا جو سبب اے ثبینؔ

قسم خدا کی وہ ہرگز بیاں نہ تھا میرا