تجھے بھلانے کی اب جستجو نہیں کرتے

تجھے بھلانے کی اب جستجو نہیں کرتے

کہ اب کسی سے تری گفتگو نہیں کرتے

وجود کو مرے موجودگی سمجھتے ہیں

وہ نا سمجھ جو مری آرزو نہیں کرتے

ہیں مہربان شجر کس قدر کہ ہو کے خفا

کبھی وہ پھولوں کو بے رنگ و بو نہیں کرتے

جو اپنے عشق کو خود میں سمائے پھرتے ہیں

تلاش پھر وہ اسے کو بہ کو نہیں کرتے

وہ جن کو پاس ہو اپنے گھروں کی حرمت کا

کسی کو وہ کبھی بے آبرو نہیں کرتے

رموز عشق جو اک بار جان لیتے ہیں

کسی کے دل کو کبھی وہ لہو نہیں کرتے

نماز غزلوں کی میری ادا نہیں ہوتی

جو حرف نام سے تیرے وضو نہیں کرتے