مہ و انجم نے قبا کی تو تمہارے لیے کی

مہ و انجم نے قبا کی تو تمہارے لیے کی

چاند چہروں پہ ردا کی تو تمہارے لیے کی

وہ بھی تھا موج میں یہ دل بھی بہکنے ہی کو تھا

اپنے ہاتھوں نے حیا کی تو تمہارے لیے کی

کوہ و صحرا میں بھٹکتے سر ساحل پھرتے

میں نے ہر گام صدا کی تو تمہارے لیے کی

دل کے اس تپتے ہوئے تند بیاباں کے بیچ

میں نے اک نہر بنا کی تو تمہارے لیے کی

مجھ سے تھا بر سر کیں ربط نہاں تم سے تھا

دل نے گر تم سے وفا کی تو تمہارے لیے کی

رات مواج تھی جب ہاتھ اٹھے اس کے حضور

سب سے پہلے جو دعا کی تو تمہارے لیے کی

میں کہاں اور کہاں شاعری میں نے تو فقط

مجلس شعر بپا کی تو تمہارے لیے کی

mah-o-anjum ne qaba ki to tumhare liye ki

chand chehron pe rida ki to tumhare liye ki

wo bhi tha mauj mein ye dil bhi bahakne hi ko tha

apne hathon ne haya ki to tumhare liye ki

koh-o-sahra mein bhatakte sar-e-sahil phirte

main ne har gam sada ki to tumhare liye ki

dil ke is tapte hue tund bayaban ke bich

main ne ik nahr bana ki to tumhare liye ki

mujh se tha bar sar-e-kin rabt-e-nihan tum se tha

dil ne gar tum se wafa ki to tumhare liye ki

rat mawwaj thi jab hath uthe us ke huzur

sab se pahle jo dua ki to tumhare liye ki

main kahan aur kahan shayari main ne to faqat

majlis-e-sher bapa ki to tumhare liye ki