پناہ ڈھونڈ رہا ہے ہر اک مکاں کی طرف

پناہ ڈھونڈ رہا ہے ہر اک مکاں کی طرف

کہ بچہ دوڑ کے آتا ہے جیسے ماں کی طرف

عمل سے آپ کے قدموں میں کہکشاں ہوگی

یہ کیا کہ دیکھا کریں آپ کہکشاں کی طرف

لہو سے سینچا ہوا گلستاں مٹے گا نہیں

ہوائیں گرم چلیں لاکھ گلستاں کی طرف

خبر یہ سب کو ہے پانی نہیں سراب ہے وہ

مگر ہیں پھر بھی سبھی سعیٔ رائیگاں کی طرف

ہٹا رہے ہو یہ تنکے تو سوچو کیا ہوگا

پرندے آئیں گے جس وقت آشیاں کی طرف

یہ رہنماؤں کے بخشے ہوئے اندھیرے ہیں

ہمیں پتا نہیں ہم چل پڑے کہاں کی طرف

کسی نے پیروں سے کچلا کوئی گلاب قمرؔ

مری نگاہ نے دیکھا ہے آسماں کی طرف

panah dhund raha hai har ik makan ki taraf

ke bachcha daur ke ata hai jaise man ki taraf

amal se ap ke qadmon mein kahkashan hogi

ye kya ke dekha karen ap kahkashan ki taraf

lahu se sincha hua gulsitan mitega nahin

hawaen garm chalen lakh gulsitan ki taraf

khabar ye sab ko hai pani nahin sarab hai wo

magar hain phir bhi sabhi sai-e-raigan ki taraf

hata rahe ho ye tinke to socho kya hoga

parinde aenge jis waqt ashiyan ki taraf

ye rahnumaon ke bakhshe hue andhere hain

hamen pata nahin ham chal pare kahan ki taraf

kisi ne pairon se kuchla koi gulab qamar

miri nigah ne dekha hai asman ki taraf