کثرت جلوہ کو آئینۂ وحدت سمجھو

کثرت جلوہ کو آئینۂ وحدت سمجھو

جس کی صورت نظر آئے وہی صورت سمجھو

غم کو غم اور نہ مصیبت کو مصیبت سمجھو

جو در دوست سے مل جائے غنیمت سمجھو

جھک کے جو سینکڑوں فتنوں کو جگا سکتی ہیں

وہ نگاہیں اگر اٹھیں تو قیامت سمجھو

نہیں ہوتے ہیں ریاکاری کے سجدے مجھ سے

میں اگر سر نہ جھکاؤں تو عبادت سمجھو

رفتہ رفتہ مری خودداری سے واقف ہو گے

ابھی کچھ دن مرے انداز محبت سمجھو

جلوہ دیکھو گے کہاں دل کے علاوہ اپنا

مرے ٹوٹے ہوئے آئینے کی قسمت سمجھو

کم نہیں دور اسیری میں سہارا یہ بھی

قید میں یاد نشیمن کو غنیمت سمجھو

خوب سمجھایا ہے یہ کاتب قسمت نے ہمیں

جو میسر ہو جہاں میں اسے قسمت سمجھو

ہم جفاؤں کو بھی انداز عنایت سمجھیں

اور تم شکر ستم کو بھی شکایت سمجھو

میری آنکھوں میں ابھی اشک بہت باقی ہیں

تم جو محفل میں چراغوں کی ضرورت سمجھو

اے صباؔ کیوں ہو در غیر پہ توہین طلب

اپنے ہی در کو ہمیشہ در دولت سمجھو

kasrat-e-jalwa ko aina-e-wahdat samjho

jis ki surat nazar ae wahi surat samjho

gham ko gham aur na musibat ko musibat samjho

jo dar-e-dost se mil jae ghanimat samjho

jhuk ke jo sainkron fitnon ko jaga sakti hain

wo nigahen agar uthen to qayamat samjho

nahin hote hain riyakari ke sajde mujh se

main agar sar na jhukaun to ibadat samjho

rafta rafta miri khuddari se waqif hoge

abhi kuchh din mire andaz-e-mohabbat samjho

jalwa dekhoge kahan dil ke alawa apna

mire tute hue aine ki qismat samjho

kam nahin dur asiri mein sahara ye bhi

qaid mein yad nasheman ko ghanimat samjho

khub samjhaya hai ye katib-e-qismat ne hamen

jo muyassar ho jahan mein use qismat samjho

ham jafaon ko bhi andaz-e-inayat samjhen

aur tum shukr-e-sitam ko bhi shikayat samjho

meri ankhon mein abhi ashk bahut baqi hain

tum jo mahfil mein charaghon ki zarurat samjho

ai saba kyun ho dar-e-ghair pe tauhin-e-talab

apne hi dar ko hamesha dar-e-daulat samjho