اجل ہوتی رہے گی عشق کر کے ملتوی کب تک

اجل ہوتی رہے گی عشق کر کے ملتوی کب تک

مقدر میں ہے یا رب آرزوئے خود کشی کب تک

تڑپنے پر ہمارے آپ روکیں گے ہنسی کب تک

یہ ماتھے کی شکن کب تک یہ ابرو کی کجی کب تک

کرن پھوٹی افق پر آفتاب صبح محشر کی

سنائے جاؤ اپنی داستان زندگی کب تک

دیار عشق میں اک قلب سوزاں چھوڑ آئے تھے

جلائی تھی جو ہم نے شمع رستے میں جلی کب تک

جو تم پردہ اٹھا دیتے تو آنکھیں بند ہو جاتیں

تجلی سامنے آتی تو دنیا دیکھتی کب تک

تہ گرداب کی بھی فکر کر اے ڈوبنے والے

نظر آتی رہے گی ساحلوں کی روشنی کب تک

کبھی تو زندگی خود بھی علاج زندگی کرتی

اجل کرتی رہے درمان درد زندگی کب تک

وہ دن نزدیک ہیں جب آدمی شیطاں سے کھیلے گا

کھلونا بن کے شیطاں کا رہے گا آدمی کب تک

کبھی تو یہ فساد‌ ذہن کی دیوار ٹوٹے گی

ارے آخر یہ فرق خواجگی و بندگی کب تک

دیار عشق میں پہچاننے والے نہیں ملتے

الٰہی میں رہوں اپنے وطن میں اجنبی کب تک

مخاطب کر کے اپنے دل کو کہنا ہو تو کچھ کہیے

صباؔ اس بے وفا کے آسرے پر شاعری کب تک

ajal hoti rahegi ishq kar ke multawi kab tak

muqaddar mein hai ya rab arzu-e-khud kashi kab tak

tarapne par hamare ap rokenge hansi kab tak

ye mathe ki shikan kab tak ye abru ki kaji kab tak

kiran phuti ufuq par aftab-e-subh-e-mahshar ki

sunae jao apni dastan-e-zindagi kab tak

dayar-e-ishq mein ik qalb-e-sozan chhor ae the

jalai thi jo ham ne shama raste mein jali kab tak

jo tum parda utha dete to ankhen band ho jatin

tajalli samne ati to duniya dekhti kab tak

tah-e-girdab ki bhi fikr kar ai dubne wale

nazar ati rahegi sahilon ki raushni kab tak

kabhi to zindagi khud bhi ilaj-e-zindagi karti

ajal karti rahe diraman-e-dard-e-zindagi kab tak

wo din nazdik hain jab admi shaitan se khelega

khilauna ban ke shaitan ka rahega admi kab tak

kabhi to ye fasad zehn ki diwar tutegi

are akhir ye farq-e-khwajgi-o-bandagi kab tak

dayar-e-ishq mein pahchanne wale nahin milte

ilahi mein rahun apne watan mein ajnabi kab tak

mukhatib kar ke apne dil ko kahna ho to kuchh kahiye

saba us be wafa ke asre par shayari kab tak