تجھ سے دامن کشاں نہیں ہوں میں

تجھ سے دامن کشاں نہیں ہوں میں

اے زمیں آسماں نہیں ہوں میں

کارواں میرے بعد آئے گا

گرد ہوں کارواں نہیں ہوں میں

پھیل سکتا ہوں چھا نہیں سکتا

روشنی ہوں دھواں نہیں ہوں میں

ناز ہے مجھ پہ میرے صانع کو

زحمت رائیگاں نہیں ہوں میں

جزو ہوں ایک جاوداں کل کا

ہاں اگر جاوداں نہیں ہوں میں

اپنی تقدیر پر یقین نہیں

آپ سے بد گماں نہیں ہوں میں

در و بست چمن کو کیا جانوں

پھول ہوں باغباں نہیں ہوں میں

زندگی پر بہار ہے مجھ سے

زندگی کی خزاں نہیں ہوں میں

یا نگاہ طلب ہوں یا جلوہ

پردۂ درمیاں نہیں ہوں میں

سوچنے دیجیے مآل وفا

آپ سے سرگراں نہیں ہوں میں

موت سے چھیڑ چھاڑ جاری ہے

زیست کا نوحہ خواں نہیں ہوں میں

آشیاں کیا بناؤں گلشن میں

قابل آشیاں نہیں ہوں میں

اے غم صبر آزما سن لے

قابل امتحاں نہیں ہوں میں

یوسفوں کا ہے کارواں مرے ساتھ

یوسف کارواں نہیں ہوں میں

میں صباؔ آہ بھی نہیں کرتا

آشنائے فغاں نہیں ہوں میں

tujh se daman kashan nahin hun main

ai zamin asman nahin hun main

karwan mere baad aega

gard hun karwan nahin hun main

phail sakta hun chha nahin sakta

raushni hun dhuan nahin hun main

naz hai mujh pe mere sane ko

zahmat raigan nahin hun main

juzw hun ek jawedan kal ka

han agar jawedan nahin hun main

apni taqdir par yaqin nahin

ap se bad guman nahin hun main

dar-o-bast-e-chaman ko kya janun

phul hun baghban nahin hun main

zindagi pur bahar hai mujh se

zindagi ki khizan nahin hun main

ya nigah-e-talab hun ya jalwa

parda-e-darmiyan nahin hun main

sochne dijiye maal-e-wafa

ap se sargiran nahin hun main

maut se chher chhar jari hai

zist ka nauha khwan nahin hun main

ashiyan kya banaun gulshan mein

qabil-e-ashiyan nahin hun main

ai gham-e-sabr azma sun le

qabil-e-imtihan nahin hun main

yusufon ka hai karwan mire sath

yusuf-e-karwan nahin hun main

main saba ah bhi nahin karta

ashna-e-fughan nahin hun main