تم نے رسم جفا اٹھا دی ہے

تم نے رسم جفا اٹھا دی ہے

ہمیں کس جرم کی سزا دی ہے

شمع امید کیوں جلا دی ہے

عشق تاریکیوں کا عادی ہے

آپ نے خود مجھے صدا دی ہے

یا مری قوت ارادی ہے

ہم تو مدت کے مر گئے ہوتے

موت نے زندگی بڑھا دی ہے

اب دعا پر بھی اعتماد نہیں

نا مرادی سی نا مرادی ہے

تجھ سا بیداد گر کہاں ہوگا

لب ہر زخم نے دعا دی ہے

مختلف ہیں تصورات جمال

یہ عقیدہ بھی انفرادی ہے

دیکھ فطرت کی بزم آرائی

خاک پر چاندنی بچھا دی ہے

یہ جو چھوٹی سی ہے کلی سر شاخ

باغ کی باد شاہزادی ہے

لب تصویر دوست کچھ تو بتا

کس نے یہ خامشی سکھا دی ہے

اے صباؔ کیمیائے غم کے لئے

زندگی خاک میں ملا دی ہے

tum ne rasm-e-jafa utha di hai

hamen kis jurm ki saza di hai

sham-e-ummid kyun jala di hai

ishq tarikiyon ka adi hai

ap ne khud mujhe sada di hai

ya miri quwwat-e-iradi hai

ham to muddat ke mar gae hote

maut ne zindagi barha di hai

ab dua par bhi etimad nahin

na muradi si na muradi hai

tujh sa bedad gar kahan hoga

lab har zakhm ne dua di hai

mukhtalif hain tasawwurat jamal

ye aqida bhi infiradi hai

dekh fitrat ki bazm arai

khak par chandni bichha di hai

ye jo chhoti si hai kali sar shakh

bagh ki bad shahzadi hai

lab-e-taswir dost kuchh to bata

kis ne ye khamushi sikha di hai

ai saba kimiya-e-gham ke liye

zindagi khak mein mila di hai