جوانی زندگانی ہے نہ تم سمجھے نہ ہم سمجھے

جوانی زندگانی ہے نہ تم سمجھے نہ ہم سمجھے

یہ اک ایسی کہانی ہے نہ تم سمجھے نہ ہم سمجھے

ہمارے اور تمہارے واسطے میں اک نیا پن تھا

مگر دنیا پرانی ہے نہ تم سمجھے نہ ہم سمجھے

عیاں کر دی ہر اک پر ہم نے اپنی داستان دل

یہ کس کس سے چھپانی ہے نہ تم سمجھے نہ ہم سمجھے

جہاں دو دل ملے دنیا نے کانٹے بو دئے اکثر

یہی اپنی کہانی ہے نہ تم سمجھے نہ ہم سمجھے

محبت ہم نے تم نے ایک وقتی چیز سمجھی تھی

محبت جاودانی ہے نہ تم سمجھے نہ ہم سمجھے

گزاری ہے جوانی روٹھنے میں اور منانے میں

گھڑی بھر کی جوانی ہے نہ تم سمجھے نہ ہم سمجھے

متاع حسن و الفت پر یقیں کتنا تھا دونوں کو

یہاں ہر چیز فانی ہے نہ تم سمجھے نہ ہم سمجھے

ادائے کم نگاہی نے کیا رسوا محبت کو

یہ کس کی مہربانی ہے نہ تم سمجھے نہ ہم سمجھے

jawani zindagani hai na tum samjhe na ham samjhe

ye ik aisi kahani hai na tum samjhe na ham samjhe

hamare aur tumhare waste main ik naya pan tha

magar duniya purani hai na tum samjhe na ham samjhe

ayan kar di har ik par ham ne apni dastan-e-dil

ye kis kis se chhupani hai na tum samjhe na ham samjhe

jahan do dil mile duniya ne kante bu diye aksar

yahi apni kahani hai na tum samjhe na ham samjhe

mohabbat ham ne tum ne ek waqti chiz samjhi thi

mohabbat jawidani hai na tum samjhe na ham samjhe

guzari hai jawani ruthne mein aur manane mein

ghari bhar ki jawani hai na tum samjhe na ham samjhe

mata-e-husn-o-ulfat par yaqin kitna tha donon ko

yahan har chiz fani hai na tum samjhe na ham samjhe

ada-e-kam nigahi ne kiya ruswa mohabbat ko

ye kis ki mehrbani hai na tum samjhe na ham samjhe