جو دیکھیے تو کرم عشق پر ذرا بھی نہیں

جو دیکھیے تو کرم عشق پر ذرا بھی نہیں

جو سوچیے کہ خفا ہیں تو وہ خفا بھی نہیں

وہ اور ہوں گے جنہیں مقدرت ہے نالوں کی

ہمیں تو حوصلۂ آہ نارسا بھی نہیں

حد طلب سے ہے آگے جنوں کا استغنا

لبوں پہ آپ سے ملنے کی اب دعا بھی نہیں

حصول ہو ہمیں کیا مدعا محبت میں

ابھی سلیقۂ اظہار مدعا بھی نہیں

شگفت گل میں بھی زخم جگر کی صورت ہے

کسی سے ایک تبسم کا آسرا بھی نہیں

زہے حیات طبیعت ہے اعتدال پسند

نہیں ہیں رند اگر ہم تو پارسا بھی نہیں

سنا تو کرتے تھے لیکن صباؔ سے مل بھی لیے

بھلا وہ ہو کہ نہ ہو آدمی برا بھی نہیں

jo dekhiye to karam ishq par zara bhi nahin

jo sochiye ke khafa hain to wo khafa bhi nahin

wo aur honge jinhen muqadirt hai nalon ki

hamen to hausla-e-ah narasa bhi nahin

had-e-talab se hai age junun ka istighna

labon pe ap se milne ki ab dua bhi nahin

husul ho hamen kya muddaa mohabbat mein

abhi saliqa-e-izhar-e-muddaa bhi nahin

shagfat-e-gul mein bhi zakhm-e-jigar ki surat hai

kisi se ek tabassum ka asra bhi nahin

zahe hayat tabiat hai etidal pasand

nahin hain rind agar ham to parsa bhi nahin

suna to karte the lekin saba se mil bhi liye

bhala wo ho ke na ho admi bura bhi nahin