تنقید کرو خوب مگر دیکھتے رہنا

تنقید کرو خوب مگر دیکھتے رہنا

بیکار نہ جائے گا ہنر دیکھتے رہنا

ہم بیچ سمندر سے گہر لے کے ہیں آئے

تم بیٹھ کے ساحل پہ لہر دیکھتے رہنا

آئی نہ کبھی لوٹ کے پھر فصل بہاراں

بے سود گیا میرا ڈگر دیکھتے رہنا

تم شور مچاؤ کہ جلا دو یہ بدن بھی

ہوگا نہ کبھی ان پہ اثر دیکھتے رہنا

جس سمت چلا نور اسی سمت اندھیرا

تا حشر رہے گا یہ سفر دیکھتے رہنا

نفرت کے اندھیروں کو محبت نے ہرایا

اخبار میں آئے گی خبر دیکھتے رہنا

صابرؔ کو بھلا کون یہاں جان رہا ہے

جو ہے وہ نہ آئے گا نظر دیکھتے رہنا

tanqid karo khub magar dekhte rahna

bekar na jaega hunar dekhte rahna

ham bich samundar se guhar le ke hain ae

tum baith ke sahil pe lahr dekhte rahna

ai na kabhi laut ke phir fasl-e-baharan

be sud gaya mera dagar dekhte rahna

tum shor machao ke jala do ye badan bhi

hoga na kabhi un pe asar dekhte rahna

jis samt chala nur usi samt andhera

ta hashr rahega ye safar dekhte rahna

nafrat ke andheron ko mohabbat ne haraya

akhbar mein aegi khabar dekhte rahna

sabir ko bhala kaun yahan jan raha hai

jo hai wo na aega nazar dekhte rahna