لب پر مچلتے لفظوں کو چکھ کر نہ دیکھ لے

لب پر مچلتے لفظوں کو چکھ کر نہ دیکھ لے

وہ پیڑ نیم کا مرے اندر نہ دیکھ لے

دل خواہشوں کے کوچے میں نکلا تو ہے مگر

وہ طفل درد پھر کہیں پتھر نہ دیکھ لے

رستے کئی بدل کے میں لوٹا ہوں شہر سے

ڈر تھا کہ وہ عزیز کہیں گھر نہ دیکھ لے

برہم بہت ہے آج وہ ہر ایک شخص سے

اپنا ہی آئنے میں وہ پیکر نہ دیکھ لے

بوندیں لہو کی سونگھتی بلی وہ درد کی

دل کا لہولہان کبوتر نہ دیکھ لے

ہیں پودا لاجونتی کا خوابوں کی مورتیں

اکرامؔ وقت ہاتھ لگا کر نہ دیکھ لے

lab par machalte lafzon ko chakh kar na dekh le

wo per nim ka mire andar na dekh le

dil khwahishon ke kuche mein nikla to hai magar

wo tifl-e-dard phir kahin patthar na dekh le

raste kai badal ke main lauta hun shahr se

dar tha ke wo aziz kahin ghar na dekh le

barham bahut hai aj wo har ek shakhs se

apna hi aine mein wo paikar na dekh le

bunden lahu ki sunghti billi wo dard ki

dil ka lahuluhan kabutar na dekh le

hain pauda lajwanti ka khwabon ki muraten

ikram waqt hath laga kar na dekh le