لمحوں کے پرندے ہیں لئے چونچ میں کنکر

لمحوں کے پرندے ہیں لئے چونچ میں کنکر

سہما سا ڈرا سا ہے کھڑا زیست کا لشکر

اک پھول لب دریا جو ڈالی سے گرا تھا

پانی میں گیا جانئے کس سمت وہ بہہ کر

چبھتا ہے ہر اک لمحہ جو اک خار کی صورت

آنکھوں سے مری چھین لے اب کوئی وہ منظر

سچ یہ بھی کہ دشوار ہے رستہ ترے گھر کا

سچ یہ بھی کہ رستے میں ہے دریا نہ سمندر

تلوار لئے لوگ مرے گھر میں کھڑے تھے

مٹی کا صباؔ فرش پہ ٹوٹا تھا کبوتر

lamhon ke parinde hain liye chonch mein kankar

sahma sa dara sa hai khara zist ka lashkar

ik phul lab-e-dariya jo dali se gira tha

pani mein gaya janiye kis samt wo bah kar

chubhta hai har ik lamha jo ik khar ki surat

ankhon se miri chhin le ab koi wo manzar

sach ye bhi ke dushwar hai rasta tire ghar ka

sach ye bhi ke raste mein hai dariya na samundar

talwar liye log mire ghar mein khare the

mitti ka saba farsh pe tuta tha kabutar