تھک کر جب بھی بیٹھ گیا ہوں میں پیپل کی چھاؤں میں

تھک کر جب بھی بیٹھ گیا ہوں میں پیپل کی چھاؤں میں

گوتم آیا گوتم آیا شور مچا ہے گاؤں میں

کھوج میں اس کی شہروں شہروں گھوم رہا ہوں صدیوں سے

جس کا نام لکھا ہے میرے ہاتھوں کی ریکھاؤں میں

مت لے جاؤ دھوپ کے اس جنگل میں بوجھل آنکھوں کو

چبھ جائیں گے خار حقیقت خواب کے کومل پاؤں میں

اپنے من کی آشاؤں کے پھول پرونا کام مرا

معنی کی خوشبو تم سونگھو شبدوں کی مالاؤں میں

سورج کی کرنوں کی برچھی روح کو زخمی کرتی ہے

آؤ یارو لوٹ چلیں ہم تنگ و تار گپھاؤں میں

thak kar jab bhi baith gaya hun main pipal ki chhaon mein

gotam aya gotam aya shor macha hai gaon mein

khoj mein us ki shahron shahron ghum raha hun sadiyon se

jis ka nam likha hai mere hathon ki rekhaon mein

mat le jao dhup ke is jangal mein bojhal ankhon ko

chubh jaenge khar haqiqat khwab ke komal paon mein

apne man ki ashaon ke phul pirona kam mira

maani ki khushbu tum sungho shabdon ki malaon mein

suraj ki kirnon ki barchhi ruh ko zakhmi karti hai

ao yaro laut chalen ham tang-o-tar guphaon mein